Trachtengruppe Zimmerwald 2018
Aktuelles
78. Hauptversammlung, 14. März 2018
Di erschte Schneeglöögli glüssle - es isch Früehlig u dermit Zyt für üsi Houptversammlig vor Trachtegruppe Zimmerwald. Bi schönstem Wätter finde mir üs a däm Mittwuch Aabe uf der Bütschelegg ii. Zyt zum Bärge gschoue, wo im Aberot lüchte heimer o, aber nume churz, im Saal wartet es feins Znacht u e spannendi Traktandelischte. Nacheme grüene Salat, Brate, Gmües, Härdöpfustock u paar Pommes frites si d Büch gfüllt u d Chöpf parat. Es isch es straffs Programm a dere 78. HV aber ide meischte Pünkt simer üs einig. Jedi Abstimmig wird mitere klare Mehrheit agnoh u Punkt 10ni isch aues besproche u Kaffi u Dessärt rüefe. Mir danke a dere Stell härzlech er Babette Karlen, wo üs während 5 Jahr als Presidäntin dür Höchs und Tiefs begleitet het. Trotz däne turbulänte Zyte hett si d’Fröid ar Trachtegruppe nid verlore u blibt üs o nach ihrem Rücktritt witerhin als Aktivmitglied im Tanze u Singe erhalte. Üsi neui Presidäntin, d’ Kathrin Fankhauser, wird eistimmig gwählt. Sie freut sich uf di neui Ufgab u git üs Trachtefroue mit ufe Wäg, dasses wichtig isch, zäme z kommuniziere, damit mer no lang so es zfridnigs u läbigs Vereinswäse chöi pflege. Me ghört zuestimmendi Wort im Saal u mir nähme dä Wunsch mit eme warme Applous zur Kenntnis. Dass mer gärn u guet chöi zäme rede bewiisemer aaschliessend grad bim Dessär. Im Saal herrscht e zfridni u aagregti Stimmig u es isch de scho nach de 11i wo sech di letschte Trachtefroue ufe Heiwäg mache.Regionaltreffen 27. April 2018
E churze und schöne Alass isches gsi das Regionalträffe. Hüür hei sich d Trachtevereine vor Region
Gürbetal/Längebärg ir Turnhalle ds Rüeggisbärg troffe. Dert hetts gnue Platz zum Tanze, hei mir üs
überleit und die Überlegig isch ufgange.
Es isch herrlich zum Zueluege (u gwüss o zum Mittanze) wie grad zwei Kreise vo Tänzerinne und
Tänzer zu lüpfiger Musig umewirble.
E grosse Dank geit hie ads Örgelitrio SPONTAN wo zu üs isch cho musiziere!!
Zwüsche de Tanzblöck hei d Trachtechör Zimmerwald und Riggisberg sowie d Sängerinne und Sänger
vo Belp ihri Lieder vortreit.
Verchöschtiget simer worde vom “Catering Gaumenreise” wo feini Pastetli kreiert het. Bim Dessert
hett de eini vo dene drü Kaffimaschine d Sicherig möge näh. Aber das hett d Profis nid eso schnäu us
dr Rueh bracht.
Merci Brigitte Hürst und Team dass dir üs ds Beizli “gschmisse” heit!!
Am Ändi vom offizielle Teil isch d Musig no lang nid müed gsi. Sie het ihrem Name alli Ehr gmacht u
sie si sogar uf die spontane Wünsch vo de Trachtelüt iigange.
So hett me bis churz vor Mitternacht chönne ds Tanzbei schwinge.
Auffahrtsgottesdienst, 10. Mai 2018 in der Kirche Zimmerwald
Es isch e graue Tag, aber mir Trachtelüt
“maches dr Sunne nah - arm oder riich - ob sie Sturm verdeckt, schiine tuets glich”
u strahle u singe am Uffahrtsgottesdienst ir Chiuche Zimmerwald.
Mit zahlriche traditionelle Lieder umrahme mir dr Gottesdienst mit Gsangsiilage.
Gemeinsamer Abend vom 27. Juni 2018
A dr Aare zwüsche Bremgarte u Zollikofe befindet sich ds Schloss Reichenbach.
E Gheimtipp a idyllischer Laag - zum Spaziere, Brätle oder fürne Aareschwumm - u di disjährigi
Adrässe für üse gmeinsame Aabe.
Nachdäm mir es paar Schritt ar Aare entlang gloffe si, cheremer im Restaurant zum Schloss ii.
Ir gmüetliche Gartebeiz im Schatte vo de grosse Böim lütemer zäme d Summerpouse ii.
Unterhaltungsabend 2018
Bald ist es wieder soweit! Die Trachtengruppe und der Männerchor Zimmerwald haben auch in diesem Jahr ein attraktives Programm für Sie zusammengestellt. Sämtliche Infos zum Programm und dem Vorverkauf finden Sie im Flyer im Menu Unterhaltungsabend.
